राष्ट्रिय सभा निर्वाचन: दाङमा मतदान जारी

दाङ । लुम्बिनी प्रदेश अन्तरगत राष्ट्रियसभा सदस्य चयन गर्न दाङमा मतदान सुरु भएको छ । दाङको घोराहीस्थित कर्मचारी मिलन केन्द्रमा बिहान ९ बजेदेखि मतदान सुरु भएको हो ।

लुम्बिनीका मुख्यमन्त्री कुलप्रसाद केसीले भोट हालेर मतदान सुरु गर्नुभयो । पूर्वमुख्यमन्त्री एवं नेकपा एमालेका महासचिव शंकर पोख्ररेलले पनि मतदान गर्नुभएको छ।

मतदानका स्थलमा प्रदेशसभा सदस्य र स्थानीय तहका प्रमुख÷उपप्रमुखका लागि छुट्टाछुट्टै लाइनमा तोकिएको छ । त्यस्तै कोभिड संक्रमणसँग मिल्दोजुल्दो लक्षण भएकालाई छुट्टै लाइनमा राखिएको छ ।

कोभिड संक्रमणको झोखिमलाई ध्यानमा राख्दै मतदान लाइनमा दुई–दुई मिटरको दुरी तय गरिएको छ । साथै मतदान स्थलमा सुरक्षा व्यवस्था पनि कडा गरिएको छ । प्रमुख जिल्ला अधिकारी, प्रहरी प्रमुखसहितको टोली नै मतदान स्थलमा खटिएको छ ।

मतदानको समय बिहान ९ बजेदेखि दिउँसो ३ बजेसम्म तोकिएको छ । विहान ९ ३० बजेसम्म स्थनीय तहका २५ र प्रदेशसभाका २२ जनाले मतदान गरिसकेका छन् ।

लुम्बिनी प्रदेशमा राष्ट्रिय सभा सदस्यको तीन सिटका लागि निर्वाचन हुँदैछ । सत्ता गठबन्धन र नेकपा एमालेका उमेदवारबीच प्रतिस्पर्धा छ ।

लुुम्बिनी प्रदेशबाट कोमल ओली, दृगनारायण पाण्डे र रामलखन चमारको चार वर्षे कार्यकाल सकिदैछ । तीन रिक्त पदका लागि हुन लागेको निर्वाचनमा सत्ता गठबन्धनबाट नेपाली कांग्रेसबाट खु्ल्ला तर्फ युवराज शर्मा, नेकपा (एकीकृत समाजवादी)बाट महिला तर्फ पाल्पाकी राजेन्द्रलक्ष्मी गैरे र दलित तर्फ जनमोर्चाबाट रुपन्देहीका तुलप्रसाद विश्वकर्माले उम्मेदवारी दिनुभएको छ।

त्यस्तै नेकपा एमालेबाट खुल्ला तर्फ दाङका रामदयाल गुप्ता, महिला तर्फ बाँकेकी भारती खनाल र दलित तर्फ गुल्मीका कृष्णबहादुर सुनारले उम्मेदवारी दिनुभएको छ।

प्रतिक्रिया दिनुहोस