काठमाडौं। प्रदेश नम्बर ५ को स्थायी राजधानी दाङ बनाउने प्रस्ताव प्रदेश ५ को प्रदेशसभामा पेश भएसँगै दाङ र अर्घाखाँचीका विभिन्न ठाउँमा घरजग्गा किनबेच रोक्का भएको छ।
प्रदेश ५ को मुख्यमन्त्री तथा मन्त्रिपरिषदको कार्यालयले निर्देशन जारी गर्दै दाङको लमही र अर्घाखाँची मालपोत कार्यालयबाट हुने घरजग्गा किनबेचमा दाङ र अर्घाखाँची जिल्लाका केही ठाउँको किनबेच र कित्ताकाटमा रोक लगाएको हो।
दाङको रामी गाउँपालिकाको सबै वडा, गढवा गाउँपालिकाको वडा नम्बर १,२,३ र अर्घाखाँची जिल्लाको शीतगंगा गाउँपालिकको वडा नम्बर ८ र ९ को घरजग्गा किनबेच रोक्का गरिएको छ। राजधानी बन्ने खबरसँगै जग्गा किनबेच बढ्नु स्वभाविक छ। यस्ता बेला जग्गा कारोबारी सक्रिय हुन्छन्। सरकारले अनधिकृतरूपमा फाइदा उठाउनेलाई रोक्ने भन्दै घरजग्गा किनबेच रोक्का गरेको हो।
