आज (बिहिवार) बेलुकी सात बजे घरघरमा दिपावली गर्न प्रधानमन्त्री ओलीको आग्रह

काठमाण्डौ : प्रधानमन्त्री केपी शर्मा ओलीले बुद्ध जयन्ती तथा कोरोना भाइरसविरुद्ध अग्रपङ्क्तिमा खटिएका स्वास्थ्यकर्मी, सुरक्षाकर्मी र स्वयंसेवकप्रति सम्मान, सङ्क्रमितको शीघ्र स्वास्थ्य लाभको कामना र ज्यान गुमाएकाको शान्तिका लागि आज (बिहिवार) बेलुकी सात बजे घरघरमा दिपावली गर्न आग्रह गर्नुभएको हो ।

नेपालमा पनि कोरोना भाइरसको सङ्क्रमण फैलिने क्रम तीव्र बनेसँगै थप सतर्कता अपनाइएको छ । गएको चैत ११ गतेबाट सुरु भएको लकडाउनलाई आउँदो जेठ ५ गतेसम्म लम्ब्याइएको छ ।

वैशाख शुक्ल पूर्णिमा अर्थात् २५६४ औँ बुद्ध जयन्ती । बुद्धको जन्म, ज्ञान प्राप्ति र महापरिनिर्वाण वैशाख शुक्ल पूर्णिमाकै तिथिमा परेकाले यस दिनमा बुद्ध जयन्ती मनाउने गरिन्छ ।

यो वर्ष कोभिड–१९ को सङ्क्रमणबाट बच्न चलिरहेको लकडाउनका कारण बौद्ध धर्मावलम्बीले चैत्य, गुम्बा, विहारलगायत ठाउँमा सीमित लामा एवं बौद्ध धर्मगुरु मात्र बसेर पूजालगायत विधि मात्र पूरा गर्ने भएका छन् । सरकारले आज सार्वजनिक बिदा दिने निर्णय गरेको छ ।

यसैबीच सरकारले आज (बिहिवार ) बेलुकी घरमै दीपावली गरेर बुद्ध जयन्ती मनाउन आह्वान गरेको छ ।

प्रतिक्रिया दिनुहोस