टिपरको ठक्करपछि गोरखामा तनाव, स्थानीयले शव बुझेनन्

काठमाडौं :-  गोरखा नगरपालिका १० स्थित छेपेटारमा गोरखकाली क्रसर उद्योगको टिपरले ठक्कर दिँदा स्थानीय एक महिलाको मृत्यु भएको छ ।

स्थानीय एक विद्यालयमा दूध पु¥याउन जाँदै गरेकी ५२ वर्षीया मनमाया तामाङलाई आज ग १ ख ८०२७ नम्बरको टिपरले ठक्कर दिएको थियो । गोरखा नगरपालिका १० अमलापानी घर भएकी मनमाया भुइँमा लडेपछि टिपर ब्याक गरेर किचेर मारेको स्थानीयको दाबी छ ।

टिपर चालकलाई प्रहरीले नियन्त्रणमा लिएको छ । घटनापछि आक्रोशित समूहले ठक्कर दिने टिपरमा आगो लगाएका छन् । साथै क्रसर उद्योगका अन्य टिपर र एक्साभेटरमा समेत तोडफोड गरिएको छ ।

उनीहरुले उक्त क्रसर उद्योग बन्द गराउन र पीडितलाई उचित राहत दिन माग गर्दै शव उठाएका छैनन् ।

उक्त क्रसर उद्योग अवैध भएको दाबी स्थानीयको छ । गोरखा नगरपालिका वडानम्बर १३ मा दर्ता भएको, तर वडानम्बर १० सञ्चालन गरिएको भन्दै उक्त क्रसर उद्योग बन्द गराउनुपर्ने स्थानीयको माग छ ।

स्थानीय प्रशासनले पीडित पक्ष र क्रसर सञ्चालकबीच वार्ताको पहल भइरहेको जनाएको छ ।

प्रतिक्रिया दिनुहोस