काठमाडौं :- त्रिभुवन अन्तर्राष्ट्रिय विमानस्थलको आन्तरिक सुरक्षा कार्यालयमा कार्यरत् प्रहरीजवान रमिता श्रेष्ठले गायिका आस्था राउतविरुद्ध महानगरीय प्रहरी कार्यालय रानीपोखरीमा उजुरी दिएकी छन् ।
‘अभद्र व्यवहार’
विमानस्थलको सुरक्षा जाँचका क्रममा गायिका राउतले आफूमाथि अभद्र व्यवहार गरेको भन्दै प्रहरीजवान श्रेष्ठले शुक्रबार उजुरी दिएकी हुन् ।
हदैसम्मको कारबाही माग
उजुरीमा आफूमाथि अभद्र व्यवहार गर्ने राउतलाई कानुनअनुसार हदैसम्मको कारबाही गर्न माग गरिएको छ ।
घटना
गएको बुधबार काठमाडौंबाट भद्रपुर जान लागेकी गायिका आस्था राउतले विमानस्थलमा सुरक्षा जाँचका क्रममा प्रहरीसँग भएको भनाभनलाई लिएर फेसबुकमा प्रहरी संगठन र सुरक्षाकर्मीहरुलाई गाली–गलौज गरेको भिडियो सार्वजनिक भएको छ ।
‘आपत्तिजनक शब्द’सहितको भिडियो
सामाजिक सञ्जालमार्फत् आफूलाई गाली–गलौज गरेको भन्दै प्रहरीजवान श्रेष्ठले उजुरी दिएकी हुन् ।
गायिका राउतले विमानस्थलमा सुरक्षा जाँचका नाममा आफूमाथि दुर्व्यवहार भएको दाबी गर्दै सामाजिक सञ्जालमा ‘आपत्तिजनक शब्द’सहितको भिडियो हालेकी थिइन् ।
‘सीसीटीभी फुटेज’मा के छ ?
तर, विमानस्थलबाट प्राप्त ‘सीसीटीभी फुटेज’मा भने गायिका राउतले सुरक्षा जाँचमा अटेर गर्न खोजेपछि भनाभन भएको देखिन्छ ।
