रोजगारीका लागि विदेश जाने व्यक्तिलाई भ्रमण वर्ष अङ्कित टिसर्ट र टोपी दिने : पर्यटनमन्त्री

काठमाडौं :- संस्कृति, पर्यटन तथा नागरिक उड्डयनमन्त्री योगेशकुमार भट्टराईले नेपाल भ्रमण–२०२० लाई लक्षित गरी आन्तरिक र बाह्य उडान थप गर्न थालिएको बताएका छन् ।

नेपाल भ्रमण वर्ष–२०२० मूल समारोह समितिको पाँचौं बैठकलाई सम्बोधन गर्दै उनले भ्रमणमा पर्यटक सहजतका लागि अन्तरराष्ट्रिय र अन्तरप्रदेश उडान थप गर्न थालिएको बताए ।

उनले अन्तर्राष्ट्रिय उडानका लागि अन्तर्राष्ट्रिय एयरलाइन्ससँग कुरासमेत भइरहेको जानकारी गराए । ‘‘सङ्घीयताको अभ्यासलाई जोड्न र भ्रमण वर्षलाई लक्षित गरेर कुन–कुन प्रदेशबीच हवाई सञ्चालन गर्न सकिन्छ, त्यसबारे अध्ययन भइरहेको छ’’, उनले भने, ‘‘चाँडै नै अन्तरप्रदेश हवाई सञ्चालन गर्ने छौँ ।’’ उनले पर्यटन व्यवसायीका मागलाई ध्यानमा राखेर पर्यटनसँग सम्बन्धित नीतिलाई सहयोगी बनाइनेसमेत बताए

मन्त्री भट्टराईले पर्यटन प्रवद्र्धनको लागि भौतिक पूर्वाधार आवश्यक रहेकाले सम्बन्धित मन्त्रालयले भ्रमण वर्षलाई सफल बनाउन भौतिक पूर्वाधारको विकास गर्नुपर्नेमा जोड दिदैं भ्रमण वर्षकै अवसरमा नयाँ हिमाल खुलाउने पहलसमेत भएको जानकारी दिए ।

उनले वैदेशिक रोजगार र अध्ययनका लागि जाने विद्यार्थीलाई भ्रमण वर्षको प्रचारप्रसारका लागि भ्रमण वर्षको लोगो अङ्कित टिसर्ट र टोपी दिएर पठाइनेसमेत बताए ।

वैदेशिक रोजगार व्यवसायी सङ्घले वैदेशिक रोजगारमा जानेलाई  र शैक्षिक परामर्श सङ्घले विद्यार्थीलाई टिसर्ट र टोपी दिएर पठाउनुपर्नेछ ।

‘‘विदेशमा जाने श्रमिकलाई रोजगारदाताका सञ्चालक र अध्ययन गर्ने जाने विद्यार्थीले आफू पढ्ने विश्वविद्यालय\कलेजका सञ्चालकलाई भ्रमण वर्ष लोगो अङ्कित कुनै न कुनै उपहार दिन लगाउने छौँ’’, उनले भने,  ‘‘डिसेम्बर १ तारिखबाट भ्रमण बर्ष अङ्कित लोगो वितरण गर्ने छौँ।’’

प्रतिक्रिया दिनुहोस