नेपाल सरकार नै मूल आयोजक समितिको संयोजक रहेर सम्पन्न हुने एनआरएनएको विश्व सम्मेलनमा सहभागी हुन आएका प्रतिनिधिहरुलाई सरकारले एक छाक खानासमेत खुवाएको छ ।
सम्मेलनको मूल आयोजक समितिमा नेपाल सरकारका पराष्ट्रमन्त्री संयोजक रहने प्रचलन छ । जसअनुसार यस नवौं विश्व सम्मेलनमा पनि परराष्ट्रमन्त्री प्रदीप ज्ञवाली संयोजक छन् । उनको संयोजककत्वमा एनआरएनका साथै उद्योग वाणिज्य महासंघ सम्मिलित मूल आयोजक समिति रहेको छ । तथापि संयोजक ज्ञवाली एनआरएनएको सम्मलेन चलिरहँदा राष्ट्रपतिसँग म्यानमार पुगेका छन् ।
एनआरएनले सम्मेलन सफल बनाउन अध्यक्ष भवन भट्टको संयोजकत्वमा आन्तरिक समिति बनाएको छ भने निर्वाचन प्रक्रियाका लागि छुट्टै निर्वाचन समिति छ ।
सरकारको मन्त्री नै सम्मेलनको मूल आयोजक समितिको संयोजक हुनुका साथै सम्मेलनको उद्घाटनको दिन लञ्च (दिउँसोको खाना) सरकारले नै खुवाउने गरेको छ ।
सम्मेलनमा सहभागी हुन २६ सयको हाराहारीमा प्रतिनिधि तथा पर्यवेक्षकहरु सहभागी भएका छन् । उद्घाटन सत्रमा प्रतिनिधिसँगै विभिन्न क्षेत्रबाट आएका अतिथि, शुभचिन्तक समेत गरी ३ हजार ५ सय भन्दा बढी सहभागी भएको एनआरएनए सचिवालयले जनाएको छ ।
एनआरएनएका प्रवक्ता भुषण घिमिरेका अनुसार उद्घाटन शत्रको दिनको खाना खर्च सरकारले नै बेहोर्नेछ । परराष्ट्र मन्त्रालयका प्रवक्ता भरतराज पौड्यालले पनि पहिलो दिनको लञ्चको खर्च सरकारले बेर्होर्ने जानकारी दिए ।
उनका अनुसार खानामा ३० लाख खर्च हुने अनुमान गरिएको छ । तर बिल आएपछि सोही अनुसारको भुक्तानी हुने मन्त्रालयका प्रवक्ता पौड्यालले जानकारी दिए । उनले ३० लाख रुपैयाँ खर्च हुने अनुमान गरे पछि सरकारले १ करोड रुपैयाँ भन्दा धेरै खर्च गर्नुपर्ने देखिएको छ ।
होटल हायातले प्रतिव्यक्ति ३ हजार रुपैयाँका दरले खाना खुवाउने गरेको छ । जसअनुसार ३ हजार ५ सयले नै खाना खाए १ करोड ५ लाख रुपैयाँ एक दिनको रकम हुनेछ ।
गैरआवासीय नेपाली संघ (एनआरएनए) को निर्वाचनमा पैसाको व्यापक चलखेल भएको सहभागीहरुले गुनासो गरेका छन् ।
उम्मेद्वारहरुले भोट फकाउन पैसाको चलखेल गरेको आरोप लागेको हो । निर्वाचनमा उम्मेद्वारी दिने तयारीमा रहेका गैरआवासीय नेपालीहरुले कतिपय प्रतिनिधिलाई आफैं खर्च दिएर बोलाएका छन् ।
